Cyfundeb Annibynwyr Penfro (From Western Telegraph)

Cyfundeb Annibynwyr Penfro

Cynhaliwyd Cyfarfodydd Gorffennaf yng Nghapel Seilo, Twffton, ar y 23ain o'r mis.

Llywyddwyd gan y Cadeirydd, y Parchg Llunos Gordon. Croesawyd ni yn wresog gan Ysgrifennydd yr eglwys, Mrs Rhian Taylor a hi hefyd a roddodd fraslyn o hanes yr achos. Croesawyd y Parchg Richard Williams i oedfa'r prynhawn a bu ef yn gyfrifol am ein Harwain mewn gweddi, gyda Mr Norman Davies yn darllen.

Y siaradwr gwadd oedd y Prifardd Eirwyn George a'i bwnc oedd "Golwg ar Fyd yr Emyn" Roedd yn llawn diddordeb a thipyn o hiwmor hefyd. Ar ol te - a diolchwyd i'r gwragedd amdano gan Mr Gwyndaf Tomos - cynhaliwyd y Gynhadledd. Ymhlith y materion a drafodwyd oedd Gynhadledd Diogelwch Plant i'w chynnal ym Mis Medi yn Hermon, Abergwaun, trefniadau ar gyfer stondyn Sioe Amaethyddol Hwlffordd a Apel Undeb yr Annibynwyr Cymraeg, Shalom/Salaam.

Cafwyd adroddiad o'r Undeb yng Nghriccieth gan y Parchg Llunos Gordon. Bum yn llongyfarch yr Ysgrifennydd, Parchg Geoffrey Eynon ar gyrraedd penblwydd pwysig, a dymunwyd yn dda i'r Trysorydd, Miss Mary Trott, sy'n anhwylus. Cymerodd Aedfa'r hwyr ffurf trafodaeth ar y pwnc - 'Archwiliad Cenhadol - Proffil Eglwys'. Roedd y defosiwn yn ngofal dwy o aelodau Seilo sef y Chwiorydd Olwen O'Connor a Rhian Taylor.

Arweiniwyd y drafodaeth gan aelodau o eglwysi Antioch, Penygroes a Fachendre sef y Chwiorydd Nesta George ag Ann Jones a'r brawd Nyfed Griffiths. Hyfryd oedd cael y Parchg Aled ap Gwynedd yn bresennol. Gwnaed y diolchiadau am weithgareddau'r dydd gan Mrs Nesta George a'r organydd oedd Mrs Rhian Taylor.